Хятад улс сарны өмнөд туйлаас усны мөс хайх "Chang’e-7" нислэгийг хойшлуулав

Хятад улс сарны өмнөд туйлаас усны мөс хайх "Chang’e-7" нислэгийг хойшлуулжээ. "Chang’e-7" нислэг Бээжингийн цагаар Даваа гаригийн /2026.08.24/ өглөө хөөрөх ёстой байв. Хүнтэй сансрын инженерийн албаны мэдэгдэлд тодорхой шалтгаан дурдаагүй, дараагийн хөөргөлтийг хэзээ төлөвлөж байгааг ч мэдээлээгүй байна. Төрийн хэвлэлд мэдээлснээр сарны хайгуулын аппарат хөөргөлтөд шаардлагатай нөхцөлийг хангахгүй байгаа аж.

АНУ, Хятад улсууд сарны өмнөд туйл дээр баазаа байгуулахаар өрсөлдөж буй. Учир нь тэндхийн нарны гэрэл тусдаггүй гүн тогоонуудад их хэмжээний мөс хэлбэрийн ус байдаг гэж үздэг. Өнөөг хүртэл ямар ч сансрын даалгавар саран дээрх усыг шууд судлаагүй байгаа юм.

АНУ хиймэл дагуулын тусламжтайгаар усны мөсийг илрүүлж, хэмжээг нь тогтоохоор ажиллаж эхэлсэн ч зориулалтын хайгуулын аппаратаа хараахан хөөргөөгүй байна. Техаст төвтэй "Intuitive Machines" компани 2025 онд зориулалтын өрөмдлөгийн төхөөрөмжөө сансарт илгээсэн боловч тус аппарат нь сарны өмнөд туйлд газардахдаа доголдож осолджээ.